Kleiva-Anna
Foto: Yngvild Gotaas Torvik

Av Anna Kleiva

 

 

små elektroniske konglar

eksploderer i øyret mitt:

sjølvlysande tre, seier han

kan lyse opp i framtida

område som ikkje har råd til skikkeleg lyssetjing

tettbygde strøk, skur i heten

og: sjølvlysande tre

forblåste gater, pistrete snø tvers gjennom

istappar og: sjølvlysande tre

 

så kjem havbotnen til jordoverflata

moreld, algar og manetar

 

greinar seg, glødande

fletter gjennom mørkeret

ut av stammane tyt

eit elektrisk

 

wunderbaum

greiner er glow sticks

eit glimande rave

til overflata

 

eg er visst ikkje framskriden nok

eg er ikkje elektronisk

eg er fysisk, ei gammal furu

ein ettertenksam type

tenkjer på

sjølvlysande tre

glor på eit sirkusdyr

 

tenkjer på å ta havet opp

ta minnet ut

av morelden, inn i treet

ta treet inn i bakken, frøa gjennom vinden

å vrenge havet i lufta

eg prøver å vere

framtida, samankopla

ta minnet mitt ut

 

men eg er ikkje

 

framskriden eller syntetisk

eg er ei nervøs osp

gammal biologi

 

//

Anna Kleiva er født i Oslo i 1985. Hun er oppvokst på Vinstra, men er nå tilbake i Oslo. Hun gav ut diktsamlinga Ti liknande versjonar i 2011. Hennes andre bok, Vårar seinare, kom i 2014, for denne har hun vunnet flere priser. Ved siden av å være poet er Anna også virksom som oversetter, og i år kom hennes gjendiktning av den amerikanske poeten Ariana Reines, Coeur de Lion, ut på norsk. For mer informasjon se Oktobers forfatterside/ Oktober bidrar med honorarstøtte til forlagets forfattere på denne nettsiden.