Helene Hovden Hareide: Vekkarklokker for bjørnar

I

 

            og så er det nokon som dreg

dyna av dei og skrik

 

                                   heisann, heisann

 

 

verdas tristaste isbjørn

                heiter Pizza, og bur

på eit kjøpesenter i Kina

           

 

 

            seinare i sendinga

skal vi også høyre om jerven

            som trur at paradis

er i Bymarka, der

            gjøken sitt fyrste ko-ko

kjem tidlegare for kvart år

 

 

god morgon, det er

på tide å vakne

 

 

 

II

 

dagens fisk

smakar som kunstgrasbane

            salaten som cocktail

            og isen

 

som ingenting

 

er det eit teikn i tida

            når isbjørnbinnene byrjar å

ta med seg ungane på bytur?

 

 

 

III

 

finst det instruksjonar som er lette å forstå?

 

lat oss spørje Sofia April og

            Bjørk Leonora, dei kan alt

om klimakrisa, dei har full oversikt

            over den globale

oppvarminga og issmeltinga

på polane, men dei veit

ingenting

 

om skogen

bak huset

 

 

 

IV

 

god kveld, vi er eit halvt minutt

            nærare midnatt, og Pizza

vil gjerne sende ei helsing

            til slekta i Kamtsjatka

som han veit er vakne på denne tida

 

(sjølv om dei ikkje burde vere det)

 

 

 

V

 

Når såg du sist ein bjørn? spør Bjørk

 

Sofia svarer

 

i går

 

såg eg ein bjørn ved

            frysedisken sine

kvite breidder

 

            den sto og stirra inn

i to kalde lakseauge

            som om det var ei hamn

 

 

/

Helene Hovden Hareide (f. 1989) kommer fra Hareid og er masterstudent i litteraturvitenskap ved Universitetet i Bergen. Hun har tidligere vært elev ved Skrivekunstakademiet i Bergen, og blitt publisert i ulike tidsskrift, bl.a. Vagant og Prosopopeia. Vi takker for dikt!