når du senkar ein lekam / Marit Kaldhol

når du senkar ein lekam i Nordsjøen

vil havet stige

med eit volum likt volumet av vatnet

lekamen fortrenger

før dagen lysnar stig vengesneglen mot overflata

for å ete                                                                        

før himmelen speglar seg 

når Antarktis smeltar

med 4500 tonn is kvart sekund

vil havet stige

med eit volum likt volumet av smeltevatnet

når Grønlandsisen smeltar

med 9000 tonn is kvart sekund

vil havet stige

vil øyer slutte å vere øyer

når permafrosten i Sibir tinar

når isbreane i Himalaya smeltar

når elver tømmer seg

når dalsider tørkar ut

vil havet stige

vil byar slutte å vere byar

heimar slutte å vere heimar

når temperaturen i Arktis stig

med ti grader kvart år

når temperaturen på landjorda stig

når havet blir mørkare

vil temperaturen på havdjupnene stige     

vil vengesneglen vingle

vil havet stige

når du senkar ein lekam med hud, hår, auge, hjarte

ned i havets skumringssoner

forbi grensa for fotosyntese

forbi grensa for kjærleik

forbi korallrev tareskog urgamle organismar som forvitrar

forvandlar mesopelagiske landskap til ørken

striper av sorg, sediment over sediment 

vil bitar av ord flyte opp

vil havet stige

vil språket drukne

vengesneglen let seg søkke mot djupet lik ein engel

sneglehus tynt som lys    

når du senkar ei framtid i havet

når du ser at framtida er ei hore, at ho kastar seg 

i armane på marine heitebølgjer

at prisen for kortvarig glede er salte sår i djuphavsslettene

vil havet stige vil vengesneglen leve vil havet teie?

ho seier: legg lekamen min på havet

dei døde flyt lett   

  

//

marit o kaldhol, født i Ålesund 1955, har sidan debuten i 1983 gitt ut ei rekkje bøker i fleire sjangrar for barn, ungdom og vaksne. Ho har mottatt nasjonale og internasjonale prisar. Sist utgitte bok: enno var dei kroppar (noveller, 2021).

Portrettfotografiet er tatt av MA Ortiz.

Vi takker Samlaget og forfatteren!